Hazırkı Davamlı inkişaf üzrə hesabat (bundan sonra “Hesabat”) Azərbaycan Respublikası Dövlət Neft Şirkətinin (bundan sonra “SOCAR”) doqquzuncu hesabatıdır. Davamlı inkişaf üzrə hesabatların dərc olunmasında əsas məqsədimiz il ərzində əldə etdiyimiz iqtisadi, sosial və ekoloji fəaliyyət göstəricilərimiz, eləcə də davamlı inkişaf üzrə fəaliyyətin idarə olunmasına yanaşma və prinsiplərimiz haqqında məlumatı bütün maraqlı tərəflərimizə çatdırmaqdır. Cari Hesabat 2019-cu təqvim ili üzrə SOCAR-ın Azərbaycanda struktur bölmələri ilə yanaşı xaricdə fəaliyyət göstərən nümayəndəlikləri və törəmə şirkətlərinin davamlı inkişafı üzrə fəaliyyət nəticələrini əks etdirir. 

SOCAR-ın 2019-cu il üzrə Hesabatı “Hesabatlılıq üzrə qlobal təşəbbüs”ün (GRI) davamlı inkişaf sahəsində hesabatlar üzrə standartların “Əsas” tətbiqetmə meyarına müvafiq olaraq hazırlanmışdır. Hesabatın məzmunu GRI təlimatlarında qeyd edilmiş əhəmiyyətlilik, maraqlı tərəflərin əhatə olunması, davamlı inkişaf və tamlıq prinsiplərinə əsasən tərtib edilmiş və tarazlılıq, müqayisəlilik, dəqiqlik, vaxtlılıq, şəffaflıq və etibarlılıq kimi prinsiplərə uyğundur. GRI göstəricilərinin açıqlanma statusunu əks edən cədvəl səh.149-da verilmişdir.

Şirkətdə maraqlı tərəflərlə müxtəlif mexanizmlərin vasitəsilə mütəmadi görüş və məlumat mübadiləsi həyata keçirilir (daha ətraflı məlumat üçün, baxın Şəkil 24). Fəaliyyətimiz nəticəsində yaranan təsirlər haqqında dolğun və şəffaf məlumat vermək məqsədilə, Hesabatın hazırlanması zamanı həm daxili, həm də xarici maraqlı tərəflərin maraqları və il ərzində yaranan iradları nəzərə alınmışdır. Bundan əlavə, əhəmiyyətli mövzu və aspektləri müəyyən etmək məqsədilə, SOCAR-ın fəaliyyəti haqqında KİV-də göstərilən əsas məqamlar, neft-qaz sənayesində fəaliyyət göstərən beş beynəlxalq şirkətin davamlı inkişaf üzrə hesabatları təhlil edilmiş və davamlı inkişafın müxtəlif sahələrinə görə məsuliyyət daşıyan əməkdaşları ilə müsahibələr aparılmışdır. Aparılan təhlillər nəticəsində SOCAR-ın fəaliyyəti ilə bağlı müəyyənləşdirilmiş və Şəkil 1-də nümayiş olunan əhəmiyyətli məsələlər Hesabatda əks olunmuşdur. Bundan əlavə, təyin edilmiş əhəmiyyətli aspektlərin SOCAR-ın hansı maraqlı tərəfləri üçün daha önəmli olduğu haqqında məlumat Cədvəl 1-də təqdim olunmuşdur.

Davamlı inkişaf hesabatında davamlılığın əsas istiqamətləri sosial, idarəetmə və ətraf mühit olaraq götürülmüşdür.